Z Ranja/Großräschen. Wšakim lazowarjam Nowego Casnika jo nadpadnuło, až stej se pśewjadłej dwě wuběźowani „Kulturelna domownja Łužyca“ a „Serbska Łužyca: pśichod“. Młoge su se myslili, až jo to jadno. Organizator wuběźowanjowu jo drje Ministaŕstwo za wědomnosć, slěźenje a kulturu (MWFK), ale wuběźowani stej zorganizěrowałej rozdźělnej referata. Pjenjezedawarja stej tek rozdźělnej byłej. Korony dla stej se wuběźowani pśewjadłej pśisamem paralelnje.

Wuběźowanje „Kulturelna domownja Łužyca“, kótarež jo MWFK ze zwězkowym fondsom k njepósrědnemu spěchowanju pśi strukturnej změnje we wusokosći jadnogo miliona euro spěchowało, jo pśiwabiło 155 nowych projektowych idejow, z kótarychž budu 24 spěchowane.