Maśica Serbska jo dariła w lěśe 2019 „Myto Bogumiła Šwjele“ Isabelle Grätzojc za jeje źěło: „Młody/a a serbski byś? – źo to?“ K tomu móžomy rozgrono z gymnaziastku z 12. lětnika w Nowem Casniku dnja 8. oktobra 2020 cytaś. Napisała jo źěło, ako jo hyšći do 9. lětnika chójźiła. Glědaš-lic na titel togo mytowanego źěła, pšašaš se ako staršy procowaŕ za serbojstwo: „Wjele zmólkow som ja zgótował?“ Dokulaž žeden młody Nimc w Pódpołdnjowem Tirolu abo młody Hodenosawni/Irokese se njepšaša, lěc móžo se teke młody luź nimski resp. indiański cuś. Se wě, Indianarje su rědko swětłowłosate a njamógu se ako „běłokóžaty“ pśedaś, tak ako Serb móžo se ako Nimc wudaś.