Z Lubnjowa/Lübbenau. W lěśu jo bramborske kněžaŕstwo wobzamknuło twórjenje pśewóźujucego wuběrka (Begleitausschuss) za „Lausitzprogramm 2038“ k strukturnemu wuwiśu we zwisku z kóńcom wudobywanja brunice. 22. oktobra jo se ten pśewóźujucy wuběrk w Lubnjowje konstituěrował. Wón dej krajne kněžaŕstwo póraźowaś a se kuždy poł lěta schadaś. Pód wjednistwom šefowki statneje kanclaje, ministaŕki Kathrin Schneideroweje, jo se tych 24 cłonkow togo gremiuma prědny raz zejšło. „Comy Łužycu pśegótowaś k modelowemu regionoju za šćit klimy a rosćenje góspodaŕstwa, źož luźe derje a raźi žywe su“, groni Kathrin Schneiderowa. K cłonkam wuběrka słušaju mjazy drugim zastupniki głownych komunalnych zwězkow, góspodaŕskich a socialnych partnarjow a pśirodowych a wobswětowych zwězkow. Serbske nastupnosći zastupujo we tom gremiumje Marcus Kóńcaŕ, zastupny jadnaŕ Domowiny a wjednik běrowa Domowiny w Dolnej Łužycy. Glědajucy na źěło pśewóźujucego wuběrka se wón naźeja, až se pśipóznawa to serbske ako „to zwězowadło za do pśichoda gódne strukturne wuwiśe we Łužycy“.