Z Baršća/Forst. Až dejmy bóžko z tym licyś, až musymy se hyšći dlejšy cas běźiś z teju swinjeceju mrětwu – to jo se groniło slědny tyźeń srjodu na pósejźenju wokrejsnego sejma Sprjewja-Nysa. Olaf Lalk, zastupny krajny raźc a wjednik togo štaba, kenž wšo rědujo kołowokoło teje chórosći, jo měnjecy, až móžo to traś snaź hyšći dwě lěśe.
Za tym, až njejo ten prědny płot, ako su nastajili pśi Nysy blisko pólskeje granice, źiwjaki z Pólskeje a z tym tu mrětwu wótźaržał, twari se něnto nowy mócnjejšy a stabilnjejšy wót Selca (Zelz) až do Gubina a pón dalej do Pśibrjoga/Eisenhüttenstadt. Mjazy drugimi se firma VERDI z Turnowa za to stara. Za twaŕ pak trjebaju dlejšy cas – nic jano pór dnjow, ako su te młoge pominali. Zacyniś granicu do Pólskeje pak njejo pśedwiźone, jo gronił Olaf Lalk. Wón jo wopisował, kak źiwjaki zginu. Wóni maju tśi do styri dnjow wusoku zymnicu a pón wumrěju. Dla togo te pytaju teke mokše strony a wódu, aby se wochłoźili.