Z Nimskeje/Deutschland. Njewumarkowana w Serbach jo powěsć wóstała, až jo Pósaarska uniwersita juž 31. měrca 2019 swóju slawistiku zacyniła. Z tym jo se wuznamny profesor slawistiki Roland Marti pódał na wuměńk 1. apryla 2019. Wón pak wucy hyšći studentam „serbskej rěcy a serbske stawizny a kultura“ w francojskem Nacionalnem instituśe za orientaliske rěcy a kultury (INALCO) w Parisu. Zajźenje slawistiki w Pósaarskej njejo jano zgubjenje za slawistiku w Nimskej, ale teke za serbstwo. Korpus wustneje serbskeje rěcy GENIE (glej: genie.coli.uni-saarland.de/), licy do wuspěchow Pósaarskeje uniwersity.

Zacynjenje slawistiskich studijnych směrow slědujo gibanju wótpóranja abo pómjeńšenja institutow słowjańskich rěcow we wšakich městach Nimskeje. Ukrainski studium na Greifswaldskej uniwersiśe jo wobgrozony. Lipšćańska slawistika, kótaraž jo měła na wuběrk, wjele kombinacijow ze słowjańskimi rěcami, jo swóje pódpołdnjosłowjańske směry wótpórała a něnto se zwětšego koncentrěrujo na wukubłanje ceptarjow za rusojsku, česku a pólsku rěc.