Slěpe/Rowne. Južo 5. raz jo w srjejźnjej Łužycy był jatšowny špacěr ako protest pśeśiwo dalšnym wótbagrowanjam. Zmakanje jo było małe jatšy (slěpjański „młode jastry“), a to njeźelu. Za tym jo stojał zwězk „Strukturnu změnu nětko – žane Wochozy II! Akciski zwjazk přećiwo planowanej jamje Wochozy II“. Zmakanišćo jo było slěpjańske dwórnišćo. Łoni jo se tam zejšło jadnab 300 luźi, lětosa jo na špacěr pśišło 150 luźi, na skóńcnem zarědowanju su organizatory licyli 250 luźi. Z tym jo se mjenjej luźi ako łoni abo pśedłoni wobźěliło. Friederike Böttcher, zastupowarka akciskego zwězka jo groniła, až wina za jeje zdaśim jo, až Vattenfall rowno co pśedaś łužyske brunicowe jamy a milinu. Togodla se wjele luźi how mysle, až žedne dalšne wótbagrowanja w slěpjańskich stronach njebudu. Wóni se cuju wěste. Žeńskecy pór z Wuskidźi jo dodał: „My se sromamy, až tak mało jo nas źinsa pśišło. Wó wobswětowych problemach luźe wu nas njekśě pśemyslowaś.“