Z Bórkow/Burg. Šery, nazymski źeń jo był slědna sobota. Weto su někotare turisty w Bórkowach se na cołnowanje wupórali. Zajmnjejše wótpołdnjo su pak drje te měli, ako su pódla byli pśi swěźenju Bórkojskeje domowniskeje śpy! Program jo wšak musał byś dla korona-situacije w mjeńšem ramiku ako w zachadnych lětach. Ale njeglědajucy na to a tejerownosći njeglědajucy na wjedro: Wótgłos woglědarjow jo wobkšuśił, až ten swěźeń jo se raźił. Wjeraška stej byłej wótwórjenje noweje wustajeńce w Domowniskej śpě – něnto se tam pokazuju fota Rudija Herzoga – a mytowanje nejrědnjejšych rucnych źěłow slědneje wósebneje wustajeńce.

W běgu programa swěźenja jo rozwjaseliła dujaŕska muzika limbarskich „Lindenmusikanten“ teke bźez rejowanja. A pśez ten program jo wjadła – w lubnjojskej serbskej drastwje, z luštnymi błośańskimi anekdotami, z pór serbskimi słowkami a z jadneju abo drugeju basnju – Marlene Jedrowa z Lipjego.