Ze Sewekowa/Sewekow (Sävko). Góruco jo na drugej awgustojskej srjoźe we wittstockowem městnem źělu Sewekow. Krowy laže mucne na pastwje mjazy Sewekojskim jazorom a drogu na zachoźe jsy. Pśi zachadanju do jsy zawupytnjom nowu dwójorěcnu droznu toflicku, wó kótarejž jo NC njedawno rozpšawił. Som ju sebje wótmólowaś kśěł, což jo jadnu kólasowaŕku narsku cyniło: Jo pšašała, co fotografěrujom. Gaž som jej to wulicył, jo se pśijaznje zasmjała. Jo pśiznała, až wšo dolnonimski rozmějo.

Na droze pśisamem njejo žedna duša. Za najsu na Šulskej droze dowiźijom muskeju, kótarejž pópšawjatej wokno – wuglěda ako bydlitej how. Wopšašajom jeju, lěc powědatej dolnonimski, na což zachopijo jaden z njeju platt powědaś. Na mójo pšašanje, lěc ma to za derje, až jo amt zapisał dolnonimske mě na droznu toflu, jo wótegronił: „Tak ako Bayerske maju swóju rěc na toflach, tak dejmy my teke swóju měś.“ A jo witał, až dej dalej městnow dolnonimske mě dostaś. Njejo pak kśěł swójo mě w NC śišćaś daś.