Z Dešna/ Dissen. Dnja 19. awgusta su naše gólcy zachopili list holowaś, aby mógli wše gromaźe (gólcy a źowća) wrota a wěnce wiś. To klincy normalnje, ak jo se stało kužde lěto. Doprědka su se ale južo někotare wěcy organizěrowali. Prědne pšašanje jo było: „Buźomy kokota cyniś abo nic?“. Wó tom smy w dešańskem pśedsedaŕstwje młoźiny zachopjeńk junija powědali. Smy wobjadne byli, až by nałog cynili teke bźez rejow. Slědne słowo su pak gólcy měli, kótarež rejtuju. Wóni su wjelgin motiwěrowane byli.

Pón jo malsnje druge pšašanje pśišło: „Kak móžomy napołožki kněžaŕstwa dopołniś?“ Jano ako młoźina njeby to móžno było, smy ga pśemało luźi. Togodla jo gmejna zagronitosć pśewzeła a gromaźe z domowinskeju kupku a sportowym towaristwom smy mógali wšykne pśedpise doźaržaś.

Reje bóžko njejsu byli, dokulaž luźe njamógu wótstawk źaržaś, gaž gromaźe rejuju. Na gluku móžomy ako młoźina, kótaraž płaśi ako towaristwo, gromaźe rejowaś a z tym normalne wuzwólenje kralowkow cyniś. Wót 13 źowćow mógu se tśo krale „tu swóju“ wuzwóliś. Wósymjo gólcy su ku kokotoju nastupili a wójowali wó głowu a kśidle kokota.