12. měrca jo był w Budyšynje volleyballowy turněr sportowego towaristwa Serbski Sokoł wó pokal Domowiny. Jo to było mjaztym južo 34. zmakanje sportlarjow z cełeje Łužyce a gósći z Pólskeje. Mimo mustwow z budyšyńskego a kamjeńskego wokrejsa su grajarje z wósady Slěpe wokoło Mata Krygarja – Dolnoserba – z mjenim Rapaki (juž 23. raz pśibytne) rowno tak wó dobyśe wójowali ako mustwo Dolnoserbskego gymnazija z Chóśebuza pód mjenim Zapalaki. Chóśebuske volleyballisty su łoni pó wjelelětnej pśestawce zasej na turněr pśijěli a 16. městno wobsajźili. Lětosa su bóžko jano slědne – to jo było 20. – městno dojśpili. Weto, chwalba jim za wobźělenje! Wó grajarjow jo se starał Stefan Šurman, na boce grajnišća jo wucabnik Torsten Mak stawnje pśiwołał „dypki!, dypki!“. Apropos Torsten Mak: Wón jo był iniciator, až jo se wutwóriła w 90tych lětach sportowa kupka na gymnaziumje z mjenim Sokoł.