Z Lipska/Leipzig. Prědny tyźeń casa bźez cytanjow jo zachopił. Z tym jo se teke „zajmny“ semester skóńcył, dokulaž korona njejo pśed uniwersitu zastała. Koronowy cas, z wjelimi napołožkami (Auflage), jo hyšći w semesterskich prozninach zachopił. Wokoło kóńca měrca jo mejlka pśišła z informaciju, až jo se zachopjeńk prezencneje wucby na 4. maj wótstarcył. Semester jo se weto – ako jo planowane było – 6. apryla zachopił, ale ako digitalny semester. To groni, až su se wšyknym wuknjecym wopśimjeśa (Lerninhalte) pśez internet pósrědnili.

To jo za kuždego, wšojadno lěc su to docenty abo študěrujuce, wósebna a se wě nowa situacija była. Lipšćańska uniwersita bazěrujo pśedewšym na prezencnu wucbu. Online-formaty njejsu tak derje wutwarjone. Formy wucby wuglědaju pón wjelgin rozdźělnje. Z tym jo start semestera skerjej „derkotaty“ był, dokulaž docenty ako teke študěrujuce su musali nowe struktury se wuzwóliś.