Z Města/Cottbus. Wót 29. junija až do 3. julija jo se wótměł tradicionelny kompaktny kurs Šule za dolnoserbsku rěc a kulturu w rumnosćach organizatora a Dolnoserbskego gymnaziuma. Z lětosnymi 45 wobźělnikami njejo se licba wjelgin rozeznawała wót teje drugich lět. Wjednica šule za dolnoserbsku rěc a kulturu Uta Henšelowa jo wjelgin pozitiwnu bilancu śěgnuła a se wjaseli, až jo wšykno pó planje běžało, až wobźělniki su wjelgin glucne, až su mógli pśiś, teke gaž su byli wósebne pšawidła dla koronoweje krize.

Koronowa kriza njejo zadorała planam Šule za dolnoserbsku rěc a kulturu, pśewjasć tradicionelny kompaktny kurs za serbšćinu ako cuzu rěc. „Prědne myslenja su byli, až musymy naš kurs wótgroniś abo jano digitalnje pśewjasć. Ale něnto smy glucne, až jo se situacija pólěpšyła a až su wšykne pśišli na wucbu“, jo groniła pśi wótwórjenju lětosnego kursa Uta Henšelowa.