Z Glinska/Glinzig. Głažana cerkwja w gołkojskem wejsnem źělu Glinsk jo něco wósebnego. W kólasowaŕskej cerkwi su źurja wócynjone. Cerkwja jo se wuwiła ako wejsne srjejźišćo z domom rědow wognjoweje wobory a z wognišćom. W njej su se w zachadnosći, pšawidłowne mšy swěśili a su se teke kulturne zarědowanja wótměli. Wót srjejź junija dajo w małem głažanem bóžem domje wósebnu wustajeńcu. Groni se jej „Serbske cerkwje mjazy Lubijom a Luborazom“. Pśedstajonych jo 21 cerkwjow, w kótarychž su se swěśili abo se swěśe mšy w górno- a dolnoserbskej rěcy. Wandrowańska wustajeńca jo źěl kulturnego ruma Górna Łužyca-Dolna Šlazyńska w ramiku wustajeńce „Pěś stolěśow. Serby a reformacija.“ Prědny raz jo była wustajeńca 2017 wiźeś a jo wót tegdy měła wjele stacijow w městnach ze serbskimi cerkwjami. Fotograf Jürgen Maćij jo informacije za wustajaŕske sćěny spśigótował.