Ze Slěpego/Schleife. Nowotwaŕ doma za rědy wognjoweje wobory słuša w slěpjańskem wejsnem źěle Rowne k nejwažnjejšym aktualnym twaŕskim pśedewześam – a to źo derje z tym doprědka. To jo pódšmarnuł Steffen Seidlich, wjednik amta za planowanje, twarjenje a górnistwo we wejsnem zastojnstwje Slěpego, wałtoru tyźeń na wobradowanju rady w Slěpem. „Surowa twaŕ w pśizemskej etažy jo gótowa. Wjerch nastwaŕka jo se tyźeń do togo betoněrował“, jo gronił. Rada gmejny jo dalšne nadawki za detailowe źěła wšakim firmam regiona rozdała. Dnja 15. junija co gmejna Slěpe ako twarjaŕ wězbu stajiś daś.