Heidelberg. Stwórtk, 10. měrca, jo wobradowała Mjeńšynowa rada tych styrich domorodnych narodnych mjeńšynow a ludowych kupkow w Nimskej. Zmakali su se Serby, Frize a Dany pla Sinti a Roma w Heidelbergu.

Njepjerwjej su měli wjeźenje pśez Heidelberg na slědach Sinti a Roma. Woglědali su se wustajeńcu k mórźenju togo luda w centrumje za dokumentaciju a kulturu Sinti a Roma.

Pótom pśi wobradowanju su póstajili śežyšća za lětosne źěło. Dla aktualneje pśicyny – měnjone su wuzwólowanja krajnych sejmow – su gronili, až zewšym njerozměju, až smějo NPD z plakatami pśeśiwo Sinti a Roma šćuwaś.

Mjeńšynowa rada pódpěrujo iniciatiwu Centralneje rady Sinti a Roma. Wóna jo napisała list wšyknym šołtam, źož budu wuzwólowanja a źož jo NPD plakatěrowała. Sinti a Roma su pominali, aby take plakaty se wótpórali. Zeprěli su se pśi tom na pósuźowanje zwězkowego ministarstwa za justicu a šćit wužywarjow.