Z Błotow/Spreewald. Hyšći źinsa słušaju bolane chromy w Błotach k nejwěcej markantnym twarjenjam w tom regionje. A pśi nich njebijo jano to kšyśe ze sćinu do wócowu, ale teke wupyšnjenja na swislach (Windlatten) na kopance (Dachfirst) su kradu nadpadne. Tym wótstojatym kóńcam zwislow, ako tradicionelnje pó wósebnej wašni wupyšnjone su, se groni „kokule“.

Swisle, te techniski notne kóńce na bokach ze sćinu pókšytych kšywow, twórje až do źinsajšnego ten zakład za šćitne a glucne symbole. Su až k 40 centimeterjam šyroke a su dla togo trjebne, aby to sćinowe kšyśe pśi bokach kšywa pśed wětšom a wjedrom šćitane było. Mócnjejše wětšy ga mógali malsnje tu kšyśinu wobškóźeś abo samo te sćiny złamaś. Něźi w 16./17. stolěśu jo twaŕska forma domow se tak změniła, až ta nowa forma pókóńca (Giebel) jo, ako rowno wopisane, k notnosći pśicynjenja swislow wjadła. A južo wót toś tych starodawnych casow su luźe we Błotach to ako kulturelnu móžnosć wužywali, te swisle wugótowaś, až pśez kopanku wótstoje – až stakim kokule maju. Techniski njejo togo trjeba było, ale tak su mógali kokule z motiwami wupyšniś.