We casu corona-wirusa a běgoty njewjasele se jano producenty toaletoweje papjery, ale teke naša mama. Wóna bydli něnto w centrumje za seniory, w něgajšnej starcowni. Drugim senioram, něgajšnym wuměńkarjam, jo śělny kontakt k swójim źiśiźiśam zakazany, dokulaž bydle w samskej jsy, ale nic w samskej domacnosći. A kuždy wě, kak wažny jo śělny kontakt za dušnu rownowagu cłowjeka. K našej mamje pak pśiźo kužde zajtšo młody muž, aby jej gumijowej štrumpje wobuł. Jeje śeśenica, kótaraž njebydli we samskem domje ako jeje źiśi, wjaseli se teke, dokulaž móžo se něnto něco pjenjez pśi štapanju gromaka pśizasłužyś. Wóna jo mě pśi telefonje groniła, a jo ze 79 lětami nejmłodša w teamje, w něgajšnej brigaźe, młoda generacija ga ma z kśicu. Ale jeje bur se wjaseli južo na pomoc něgajšnych cołnarjow a rejowaŕkow chóśebuskego źiwadła pśi terganju górkow, dokulaž pó coronje buźo pjenjez za kulturu mało. Rowno tak wjasele se błośańske burowki, kenž pśed Měsćańskeju halu w Chóśebuzu sad a zeleninu pśedawaju.