Z Prjawoza/Fehrow. Dokulaž nalětna trajda jo łoni ekstremnje škódowała dla sušy, jo wjednistwo Prjawoskego rolnikaŕskego zawoda (Betrieb) nazymu pśisamem jano zymske kultury wuseło: zymske žyto, pšenicu a jacmjeń. Pastwy su z tšawu a kwiśinu wobsete, na nich ga deje se jich krowy pasć. Doněnta jo padnuło dosć dešća, a wšo se zeleni a derje rosćo. Ale južo chapja zasej sucho bywaś, pśez póla dujo mócny a suchy wětš, a wóno se póderbi zasej dešća. To jo Casnikoju rozkładował Georg Ludwig, jaden teju dweju wjednikowu firmy.

Kak budu žni kóńc julija wupadnuś, to za jogo suźenim njedajo se nikak zwěsćelowaś. Włogi we zemi jo dosć, aby spła (Halme) pšawje narosli. Trajda pak pótrjeba wódu teke we pózdźejšej fazy, gaž se zakładuju kłoski a zernka. Njebuźo-li se wótněnta padaś, ga móžo ten zły scenario wót łońskego lěta se hyšći raz staś.

Pó ekstremnej sušy slědneju lětowu njejo gruntowa wóda dostała dawno hyšći swój pjerwjejšny niwow. To se wiźi we studnjach. Ludwig se togodla wjelgin naźeja, až buźo se hyšći padaś.