Z Raduša/Raddusch. Łoni su zapust w Radušu z dešćom swěśili. Lětosa jo dešć zasej był pśipowěźony, ale su gluku měli! Wjedro jo 29. februara, na tom mjaztym źasetem zapusće nowšego casa, wjelgin dobre było, a dešć jo akle se zachopił, ako su se wjacor napoł sedymich do zala hotela „Radduscher Hafen“, źož su se do togo pśed pśeśěgom zmakali, wrośili.

Wót lěta 2001 wobstoj w Radušu Domowniske a drastwine towaristwo a wóžywijo tudske tradicije, teke zapust. „Wobźěliło jo se how na zapustach w slědnych lětach wokoło 50 pórow. Lětosa, k źasetemu zapustoju, smy měli 62 pórow, teliko ako nigdy do togo! Mjazy nimi jo było teke sedym źiśecych pórow“, wjaseli se Stephanie Hohmannowa (40), dłujkolětna pśedsedaŕka Domowniskego a drastwinego towaristwa. Wóna jo mimo togo na to pokazała, až teke wjele luźi, ako jo do Raduša pśiśěgnuło, jo se na zapusće wobźěliło.