Ze Zaspach/Saspow. Wokoło 20 lět jo Zaspowaŕka Marlies Smołcyna (Schmolke) rejowańsku kupku za źiśi w Zaspach wjadła. Za tym, až ten projekt jo pśed pór lětami wusnuł, jo jeje źowka Vivien (29) jen zasej wóžywiła. Pla njeje a jeje pódpěraŕkow mógu źiśi wót 2017 w Zaspach zasej rejowaś wuknuś a se na wustupy w serbskich drastwach pśigótowaś.

Vivien Krügerowa (roź. Smołkojc) jo se w Zaspach naroźiła a wótrosła, jo na někotare lěta w Měsće bydliła a pón zasej do Zaspow, źož se tak pšawje doma a wjelgin derje cujo, slědk śěgnuła. Dla jeje wrośenja jo Tina Šomberojc (20), kótaraž jo teke ze Zaspow a něgajšna rejowańska wuknica Marlies Smołcyneje, jej naraźiła, až by ga mógała tu powdanu rejowańsku kupku zasej natwariś a dalej wjasć. Vivien jo se za tu ideju zagóriła a to rada cyniła – z pomocu Tiny tak ako z Oliviu Frencelojc. Ta slědna, něgajšna wjednica zaspickeje młoźiny, studěrujo mjaztym zwenka Łužyce a njejo wěcej pódla. Tina pak hyšći jo, a mimo togo mjaztym teke Nadine Schubertojc (24), Annika Guttkojc (12) a Manuela Muellerowa (54).