Nowe pśedsedaŕstwo Njepilic towaristwa (wót lěwego na pšawy bok): Manfred Nikel (pśedsedaŕ), Rudi Krawc, Manfred Richter (wobej pśisedarja), Marlies Nagorcyna (móšynaŕka), Inge Mušalekowa (pismawjednica) a Gert emmerich (zastupny pśedsedaŕ). Na fotografiji felujotej Ingrid Lejnikowa a Gertrud Hermašowa. 
Z Rownego/Rohne. 3.900 – teliko woglědarjow jo towaristwo Njepilic dwór pśiwabiło łoni na tšojenja, ak su organizěrowali pód motto „Kak to jo było“. To jo wěcej ako lěto pjerwjej – jo gronił pśedsedaŕ Manfred Nikel pětk tyźeń na jich woklapnicy.
Wóni su pśewjadli 83 wšakich tšojenjow, to jo narowno sedym na tyźeń. Wóni su 27 raz woglědarjow pó dwórje wjadli. Pśedewšym Manfred Richtaŕ, Erika Petrikowa a Manfred Hermaš su se wó to starali. Teke Karin Kawcowa, Inge Mušalekowa a Gertrud Hermašowa su se angažěrowali. Stakim jo to łońske lěto było to nejwěcej intensiwne wót załoženja towaristwa we lěśe 1999 – jo Nikel gronił, se źěkujucy tym wjelim cłonkam a pomogarjam.
„Škóda jo, až to wótmyslone dalejwjeźenje kursa serbskeje rěcy njejo se łoni raźiło. My comy jen zasej aktiwěrowaś, to wóstanjo wažny nadawk“, jo pśedsedaŕ gronił. „Pśeto dwór jo wót serbskeje rěcy žywy, a to dej tak wóstaś. Ju cesćiś a nałožowaś, jo za nas nastupnosć wutšoby“.
