Žylow/Sielow. Wósym źiśi ze serbskeje źiśownje Mato Rizo chójźi raz we tyźenju do Laguny plět. Nazgónjona instruktorka ze Sportowego policajskego towaristwa ma te šesćlětne źiśetka na starosći, aby za tśi mjasece bójazń pśed wódu zgubili a nawuknuli pšawje derje plěś.

Kak taka plějarska wucba wuglěda? Źiśi su dostali zaprědka wšaki rěd, kótaryž źaržy je na wóźe. Plějarske wobrycki na ruce, plějarski pas a plějarske žerźe. Młoge góle wuglěda hejnak gódowny bom, wopowjesany ze wšakim „pyšnjenim“. Na pśikaz ceptarki zeskokaju te skobodnjejše ned do basenka, do dłymokeje wódy. Te pitśku bójaznjejše zesedaju se nejpjerwjej na kšomu basenka a sunu se pómałem nutś. Rownož wóda jo dłymoka, njemusy žedno góle tšach měś, až se zalejo. Ten rěd źaržy je zwjercha, teke ceptarka pomoga. Něnto muse z nogoma a rukoma machaś a dostaś drugi kóńc basenka.