Nadawki a źěłabnosći instituta za Sorabistiku w Lipsku su byli tema zmakanja 1. měrca. Do lipsćańskeje uniwersity jo pśichwatało pśisamem 20 serbskich luźi, za wětšy part z Górneje Łužycy. Až na Fabiana Kaulfürsta bóžko njejo mógał nichten z Dolneje Łužyce pśipódla byś. Zawina za to jo, až jo rowno we tom casu zmakanje Serbskeje seśi było. Pśidatnje jo to pśepšosenje do Lipska wót 15. februara młogim pśe krotkodobne było. Stakim njejsu dolnoserbske temy na toś tom zarědowanju w srjejźišću stojali.

Wažne jo to zarědowanje wósebnje dla togo było, až lipsćański institut jo se w slědnem casu we Łužycy wótšo kritizěrował. Argumenty su za wětšy part, až na instituśe za Sorabistiku se wuce teke keltiske rěcy a studium mjeńšynowych rěcow. Serbska rěc pak njejo wěcej tak cesto powědana ako hyšći pśed lětami.