Łužyca/Lausitz. Fraunhofer Center for Responsible Research and Innovation (CeRRI) jo koncipěrował, pśewjadł a moderěrował styri „Labory na cas“ w Bramborskej a Sakskej. Ako prědne, 28. januara, su byli ze swójim „Mobilnym rumom pśichoda“ w Chóśebuzu, 29. januara w Lubnjowje, 4. februara w Běłej Wóźe a 5. februara we Wórjejcach. Wšuźi jo se póbitowało konsekutiwne pśełožowanje mjazy dolnoserbskeju resp. górnoserbskeju a nimskeju rěcu. Mysl za tymi źěłaŕnjami jo była, Łužycanarjam a Łužycanaŕkam jadnu kraje pśesegujucu platformu bitowaś, w kótarejž mógu ideje zběraś za wuwijanje pśichoda Łužyce. Su se wuměnjali z regionalnymi akterami ze wšakich wobłukow ako góspodaŕstwa, slěźenja, kubłanja, wuměłstwa a politiki. Karin Tšukowa jo ako regionalna powědaŕka Domowiny na prědnej platformje w Chóśebuzu pódla była a groniła k tomu: „My Serbowki a Serby smy załožk regionalneje identity Łužyce z našeju kulturu a rěcu. Serbske zgromaźeństwo se togodla wjelgin rad zapśimjejo z lokalneju wjelerakosću do diskusije wó perspektiwu našogo regiona.