Groźišćańske wobydlarje cakaju njesćerpnje na to wobzamknjenje, źo buźo nowa šoseja do Baršća hyś. Wóni póžedaju, aby wóna njewjadła pśez jich wjas kaž něga, ale šła wjelgin nawokoło. Wóni wšak maju spódobanje na tom, až dla wugloweje jamy lažy jich wjas „na kóńcu swěta“ a žedne awta pśez wjas njejězdźe. Tudy ga jo kóńc drogi, a niźi njepśiźoš dalej. By-li šoseja pśez wjas šła, ga by to był kóńc jich měrnego žywjenja – pótom by wjelicka licba awtow se pśez Groźišćo walała.

Až šoseja do Baršća buźo se twariś, to jo wěste a wustajone we planje za wuglowu jamu. Wokolny źěł jamy južo pśisamem saněrowany, a wobydlarje picańskich stronow póžedaju za krotkeju drogu do Baršća, jich wokrejsnego města, kótaraž dej prěki pśez něgajšnu wuglowu jamu wjasć, tak ako jo to něga raz było. Prědkstojaŕ Andre Wjencko jo na woklapnicy gronił, až jadna zastupnica LMBV jo pśed gmejnskeju radu gano prědny raz zjawnje groniła, až ta šoseja buźo Groźišćo daloko na pódwjacornem boce wobejś. To wugrono njama derje kaznisku móc, ale weto dajo jim naźeju, až jich póžedanje buźo dopołnjone. Nowa šoseja dej byś 2025 gótowa.