Komentar ku komentaroju „Jo DSG šula ze serbskim profilom?“ z pjera Friederike Vos­kampojc, wuknice DSG (NC 1/2019)

Jo Dolnoserbski gymnazium šula ze serbskim profilom? Zawěsće! Njedajo se na tom cwiblowaś, ale co groni „profil“? Jo pśi tom efektiwnosć a konsekwentnosć měnjona?

Jo chwalobnje ako młoda žeńska serbskorěcny artikel w Casniku wózjawiś a sebjewědobnje swóju šulu zastupiś, ale jo to pšawa wašnja póstupowanja? Za mójim zdaśim felujo kusk wopšawnjoneje (sebje-)kritiki.

Móžo byś, až jo měł kuždy abiturient DSG šesć lět wucby, ale „znajo kuždy wuknik togodla kulturu a rěc wjelgin dokradnje“? Ně... to bóžko njejo wěrno!

Źo jo pótom ta mań młodych dolnoserbskich aktiwistow, njeglědajucy na jadnosamych wójowarjow we wejsnej młoźinje? Na kuždy pad njestuděruju wóni w Lipsku. Rozmjej, kwota absolwentow DSG jo tam katastrofalna, a samo gaby kněni Vos­kampojc, kenž zazdaśim wjele potenciala za sorabistisku karieru ma, tam chopiła studěrowaś, ga weto njeby z tym wobstaśe rěcnych ekspertow za Dolnu Łužycu było garantěrowane.