Njebjelčicy/Nebelschütz w Górnej Łužycy. Iniciatiwa Serbski sejm ma wótněnta nosarja (Träger). To jo towaristwo „Smy“, kótarež jo se tudy załožyło srjodu pśed dwěma tyźenjoma. Wóno buźo iniciatiwu pódpěraś a se staraś wó pjenjeze a juristiske nastupnosći. Te źewjeśo załožarje su do statuta zapisali mjazy drugim, až towaristwo dej serbsku rěc a kulturu kaž teke bergarski a interkulturelny angažement mócowaś a źěłaś za ten wustajony cil: stwórjenje demokratiski legitiměrowanego zastupnistwa serbskego ludu. Pśistupiś k towaristwoju móžo kuždy, teke juristiske paršony.

Zgromaźone cłonki su jadnogłosnje wuzwólili powědarja iniciatiwy dr. Měrćina Wałdu za pśedsedarja towaristwa. Za zastupneju pśedsedarjowu su wuzwólili šołtu Njebjelčic Tomaša Čornaka a Hanzo Wylem-Kella ako zastupnika Dolneje Łužyce. Rěcnik Helmut Schwarz jo wuzwólony za móšynarja a Gunnar Schneider z Zwickaua za pismawjednika.