Vanesa Thielojc, wuknica a serbšćinaŕka w šuli w Bórkowach, jo powědała serbski tekst za nowy film wó Bórkowach. Serbska ceptaŕka Maria Šulcojc jo jej pomagała. 
W oktobrje 1990 bu załožony Biosferowy rezerwat Błota, a w aprylu 1991 jo UNESCO ako gremium UNO jen pśiwzeła do wjelikeje licby takich bio-rezerwatow na cełem swěśe.
Błotojski rezerwat, kótaryž nawjedujo wót wšogo zachopjeńka Eugen Nowak, jo 475 kwadratnych kilomejtari wjeliki, a wón jo rozdźělony do 23 mjeńšych stronow za šćit pśirody a do 7 jědrowych conow (Kernzonen). Wokoło 1570 kilomejtari dłujke su Sprjewja a druge rěki, tšugi a groble, a dogromady 37 jsow we wokrejsach SPN, OSL a LDS lažy w biosferowem rezerwaśe. K tej wjelgin bogatej a pisanej naturje słušaju mjazy drugim 850 wšakich mjatelow, 113 mušelow a slinikow, 36 wšakich rybow, 140 wšakorakich ptaškow a wokoło 900 bomow, krickow a drugich rostlinow.
