Gaž glědamy na situaciju Serbow jo jaden fakt widobny. Serbski lud jo jano mała mjeńšyna w Nimskej. Za mójim zdaśim nichten njamóžo to změniś, ale to njejo problem. Nejwětšy problem jo, až dajo mjenjej a mjenjej luźi, kótarež maju serbsku ako maminu rěc. Slěd jo, až serbska rěc mrějo, a z njeju teke ceła serbska kultura a serbske tradicije.

Tomu musymy zadoraś, ale to funkcioněrujo jano z wjelgin mócneju pódpěru. Taku trjebamy wót kněžaŕstwa, to jo na kuždy pad wjelgin wažne. Mója ideja jo: Gaž wěcej luźi pó­znajo serbsku mjeńšynu a jich wósebnosći, ga wěcej luźi se zajmujo za serbsku rěc a kulturu a pomaga jo zdźaržaś. Za to jo wažne, až teke luźe zwenka Łužyce znaju něco wó Serbach. We casu interneta móžomy to lažko realizěrowaś. Teke dowolarje a woglědarje Błotow abo Łužyce su wěsće zajmowane, gaž dajo krotke kurse wó nałogach a rěcy Serbow. Teke wšakorake serbske institucije cynje wjele za zdźaržanje rěcy.