Ze Slěpego/Schleife. Ned pó zymskich ferijach, 24. februar, buźo prědny šulski źeń w nowem Nimsko-serbskem šulskem kompleksu dr. Marjany Grolmusec. Južo něnto su wšykne śpy a kabinety gótowe, wšykno jo nowe. Twaŕ noweje šule źo slědk na wujadnanje slěpjańskeje gmejny z Vattenfallom z lěta 2008, ako narownanje za pólo I Wochožańskeje jamy. Pótom jo koncern LEAG ten projekt pśewzeł.

Krotko pśed wótwórjenim jo Steffen Seidlich wót twaŕskego amta w Slěpem nas pśez nowu šulu wjadł a wšo rozkładował. Princip dwójorěcnosći płaśi we cełej šuli, a wšykne tofle a napisma su nimske a serbske. Tradicionelne serbske mustery su wiźeś na sćěnach śpow, a na głažku wjelikich woknow we wjažy a na źurjach. Turnaŕnja wobstoj z dweju grajneju pólowu, teke teren sportowego towaristwa stoj k dispoziciji.