Z Pódstupima/Potsdam. Źo dajo jadnu zjawnu wuměnu mjazy politiskeju a wědomnostneju rowninu, gaž źo wó mjeńšynowe nastupnosći? Źo dajo k tomu hyšći wuměnu mjazy pśisłušnikami mjeńšynow mjazsobu? Taku platformu bitujo Federalistiska unija europskich narodnosćow (FUEN) z Forumom mjeńšynowych regionow. Taki forum jo se 11. a 12. decembra w krajnem sejmje w Pódstupimje wótměł. Tema jo była demografiske wupominanje a kak mjeńšyny mógu z tym wobchadaś.

Wšuźi w Europje wiźimy tendencu, až luźe ze jsow do městow śěgnu. Rowno te młode na jsy lěbda hyšći perspektiwy za sebje wiźe. Móžnosći wukubłanja, źěło a lěpšy žywjeński standard namakaju skerjej w městach. Forum wót FUEN jo pokazał, až wětšyna mjeńšynowych zgromaźeństwow se na kraju namakajo. Toś jo to rowno za wejsańske mjeńšynowe zgromaźeństwa bejne tšuśe a problem za dalšne wuwiśe, gaž jich dorost wótdrogujo. Rědko te kwalificěrowane młode se wrośiju, aby domowniski region mógał wót jich nazgónjenjow a wěźenja profitěrowaś.