Gaž se bomam njejźo derje, su wóni tšachota za wobchad. Suche, nagnite a chóre bomy abo gałuze mógu padaś na drogi, kólasowaŕske sćažki abo chódniki. To njedej byś, togodla wórduju bomy pśi drogach pšawidłownje pśepytowane. Za to su raz gmejny abo města, raz wokrejse a raz Bramborska zagronite. To wótwisujo wót togo, lěc wótpowědna droga jo wokrejsna droga, komunalna droga abo krajowa droga. We wokrejsu Sprjewja-Nysa jo Güttlerojc Stefanie z Janšojc pśistajona za pśeglědowanje bomow pśi drogach, wót łońskego lěta jo wóna „kontrolerka bomow“ pśi Nišem zastojnstwje za naturu. Nowy Casnik jo ju pśewóźował pśi jeje źěle blisko Cazowa.