Ze Serbskego domu. Domowinska župa Dolna Łužyca pśewjeźo swóju głownu zgromaźinu w lěśe 2020 w Rogowje/Horno pla Baršća. To su cłonki župnego pśedsedaŕstwa slědny tyźeń na swójom lětosnem slědnem pósejźenju w Serbskem domje wobzamknuli. Ako termin za to su wustajili pětk, 20. měrc 2020. Z tym dej se teke pśipóznaś dobre źěło tamneje Domowinskeje kupki.

Tejerownosći jo župne pśedsedaŕstwo rozsuźiło, až dej byś na głownej zgromaźinje, na kótaruž su kazane zastupniki z tych 40 kupkow a 28 towaristwow, głownje to grono wó serbskem šulstwje w Dolnej Łužycy a docełego wó situaciji a wažnosći serbskeje rěcy.

Rowno z tym jo se župne pśedsedaŕstwo na swójom pósejźenju wósebnje zaběrało. Zastupniki Domowiny w šulskich konferencach w 6 zakładnych šulach, źož se pśewjeźo Witaj-wucba (Žylow, Brjazyna, Tšupc, Bórkowy, Janšojce a Wětošow) a na Dolnoserbskem gymnaziumje su wulicowali wó swójom źěle a wó situaciji na tych šulach. We Wětošowje maju wót 1. do 6. rědownje Witaj-kupki. Zgromadne źěło z Kita, źož jo Witaj-projekt, a ze šulskim hortom jo dobre, a towaristwo „Tyca“ to serbske derje pódpěrujo.