Łoni jo mě pśijaśel z Lüchowa pśi mójom wóglěźe we Wendlanźe gronił, až maju na drugej stronje rěki Łobja we jsy Alt Jabel w cerkwi zamurjowanu woprowańsku šklu ze słowjańskego casa. Toś smy mała narska kupka tamkor dojěli. Mě teje jsy ma samski póchad a wóznam kaž wu nas Gablenz/Jabłoń njedaloko Chóśebuza a Gablenz/Jabłońc pla Běłeje Wódy. Wóno wobznanijo, až su how něga domorodne Słowjany jabłonje kubłali. Do źinsajšnego se regionje groni Jabeler Heide.