Něnto jo jasne, chto budu te mustwa, pśeśiwo kótarymž dejtej serbskej mustwje žeńskich a muskich na zachopjeńku graś na EUROPEAŹE, pśi europskich mejstaŕstwach narodnych a etniskich mjeńšynow. Te se wótměju pśiduce lěto wót 20. do 28. junija w Korutańskej/Kärnten w Awstriskej. Jeje głowny organizator jo FUEN (Federalistiska unija europskich narodnych mjeńšynow), jej pśisłuša wušej 100 organizacijow a towaristwow w 35 europskich krajach, mjazy nimi z lěta 1990 teke Domowina. FUEN zastupujo wětšy źěl tych wokoło 300 narodnych mjeńšynow w Europje z wušej 100 milionow cłonkami. Jeje głowy partnaŕ pśi EUROPEAŹE a jeje pśigótowaŕ jo słowjeńska mjeńšyna w Awstriskej (Koroški Slovenci).
EUROPEADA se pśewjeźo głownje w 11 městach a gmejnach kołowokoło znatego Klopeinerskego jazora, kótarež jo znate a woblubowane za turizm, a w jadnej gmejnje w susednej bliskej Słowjeńskej. Te nejwažnjejše graśa na kóńcu turněra budu pón we wjelikem stadionje w Klagenfurśe (Celovec).