Z Drjowka/Drebkau. Serbski wuběrk wokrejsa Sprjewja-Nysa jo za to, aby wokrejs oficielnje dwójorěcne nimsko-serbske mě měł. Ta móžnosć ga jo něnto pśez nowelěrowanu Serbsku kazń pśiwdana, a pśi góźbje něntejšnego aktualizěrowanja statuta wokrejsa dej to dwójorěcne mě se tam oficielnje wustawiś.

To su sebje gronili cłonki na wobradowanju srjodu pśed dwěma tyźenjoma w Domje Lotara Balka. Pódla statuta su wóni se teke pśiwobrośili koncepciji za wuwijanje wokrejsa, a z wust decernenta za šulstwo su zgónili informacije wót serbskeje wucby a Witaj-projekta we wokrejsu.