Ze Serbskego sejma. Nimske kněžaŕstwo ma to wótglědanje, ILO-konwenciju 169 k woplěwanju indigenych ludow ratificěrowaś. Taku powěsć jo Kanclaŕski amt w Barlinju pósłał wótpósłanemu Serbskego sejma Heiko Kozeloju. Wón jo pjerwjej ako pśedsedaŕ wustawowego wuběrka Serbskego sejma se na kanclaŕku wobrośił, se pšašajucy, co kněžaŕstwo se mysli: Deje Serby ako indigeny lud se pśipóznaś abo nic?

We wótegronje kanclaŕki stoj: „Ludowe kupki a mjeńšyny su źěł kulturneje a historiskeje identity. Jich wobzwarnowanje pśipomoga kulturnej wšakorakosći a móžo teke wuměnu mjazy statami mócowaś“. A: „Nimskemu kněžaŕstwu jo woplěwanje indigeneje ludnosći wósebnje wažne“, dla togo su wóni to póžedanje zapśimjeli do koaliciskego wujadnanja. Wó jogo dopołnjenje stara se Nimske mi­nistaŕstwo za źěło a socialne nastupnosći.