Mikławš Krawc, z rodom ze jsy Sernjany (Zerna), jo wordował pócesćony z Mytom Domowiny za swójo wugbanje na pólu serbskego sporta, za wobstawne žurnalistiske źěło a za woplěwanje mjazynarodnych kontaktow k drugim Słowjanam. Wón jo absolwěrował serbski gymnazium w českich Warnoćicach, źož jo se słowjańskego ducha nasrěbał. Wón jo studěrował na pedagogiskem instituśe w Małem Wjelkowje a pśišeł ako „nowowucabnik“ do Dolneje Łužyce, serbske šulstwo twarit. Jo wucył serbsku rěc w Bórkowach. Pótom jo se pśistajił na serbskej wótnožce Nimskego pedagogiskego centralnego instituta, źož jo pisał wucbne plany a materialije za wucabnikow.
Cas žywjenja pak wón jo zapalony sportaŕ. Južo w młodych lětach jo balo kopał a był cłonk serbskego balokopaŕskego mustwa. Pótom jo wuspěšnje grał volleyball we sportowem towaristwje Rotacija Budyšyn a był wjednik volleyballoweje sekcije budyšyńskego wokrejsa.