Z Mósta/Heinersbrück. K temje „Serby a AfD“ smy južo pśi góźbje komunalnych wólbow (NC 22/2019) a wót wuspěchow teje partaje wu nas pśi krajnych wólbach (NC36/2019) pisali. Něnto smy k tej temje dalšny pokazk dostali. W nimskem casopisu „Der Spiegel“ (wudaśe 37/2019) su měli pśinosk z titelom „Von wegen ‚bürgerlich‘: Der völkische ‚Flügel‘ übernimmt die AfD“. We artikelu su citěrowane wšake luźe, ako su AfD we wólbach swój głos dali. Mjazy drugimi jo se ten casopis wubrał někogo ze jsy Móst. We tej jsy jo AfD měła drugi nejwětšy wuspěch w Bramborskej. Wótegroniła jo reportarjoju togo casopisa Andrea Langowa. Mósćanaŕka jo w Serbach znata, dokulaž rejujo w ansamblu „Barbuk“ a organizěrujo „Serbski pśi kafejpiśu“ w picańskem centrumje seniorow, za tym stoj Šula za dolnoserbsku rěc a kulturu.