Slědnu sobotu a njeźelu su na Górach swěśili jubilej – wšak jo wjas była pśed 550 lět prědny raz pomjenjona něźi w urkundach. Dłujku chylu do swěźeńskego kóńca tyźenja su wabili za to, na wjelikich słomjanych póstawach a teke z bantami w serbskich barwach pśi tofli do jsy.

Kak su nastali Góry? Ta nejmjeńša gmejna w bórkojskem amśe ma swóje kórjenje w lěśe 1469. Tencas jo pšuski kurwjerch Fryco II., „ten zelezny“ (abo zelezny zub) swójomu knechtoju Hans Czinke darił źěl wjaski „Ghor“. To darjenje su napisali w urkunźe, a wóna jo prědny dokument wót eksistence źinsajšnych Gór. Až to wšo jo se stało pśed 550 lětami, jo šołtowce a wejsanarjam była góźba za dłujki swěźeń. Ceła wjas jo była pódla.