Katollojc manźelskej Ines a Claus ze Žylowa stej dobyłej pśi 9. fotografiskem wuběźowanju „Chó­śe­buz na cełem swěśe“ wósebne myto. 418 luźi jo swóje fotografije pśipósłało. Mjazy nimi jo jury wuglědała jadnorazowy motiw, kótaryž jo nastał pla luda Himba w Namibiskej. Claus Katoll jo dał nam póglědnuś do swójeje zběrki 1500 fotografijow...

Nowy Casnik: Luźe droguju źinsa wjele pó swěśe, ale Namibiska njesłuša k cestym cilam. Dla cogo stej na styri tyźenje spušćiłej europsku ciwilizaciju a wochylu wjadłej jadnore žywjenje?

Claus Katoll: Sport jo na tom wina. Wy dejśo wěźeś, až mej smej se južo pjerwjej wobźěliłej na maratonach w eksotiskej wokolnosći: w Chińskej a w Burmje. W Chińskej smej pśi maratonje 1000 trepow na chińskej muri górjej gnałej. A ako naša drogowarska agentura Richard Hölscher z Münchena jo nama pśirucyła, aby do Namibiskeje woglědałej, ga smej ned wěźełej, až to jo něco za naju. Tam comej naju mócy we takem wuběgowanju wopytaś.

Maraton gnaś pśi 40 gradach we chłodku? Maśo pśi tom frejdu?