Z pólskego Gubina/Gubin. Pólski energijowy koncern PGE njekrydnjo wót pśisłušnego wobswětowego zastojnstwa pśizwólenja za planowanu wuglowu jamu pla Gubina na pólskem boce Nyse. To wót kazni wustawjone amtske pśespytowanje, kak wuglowa jama se wucynijo na naturu a wobswět (Umweltverträg­lichkeitsprüfung), jo wordowało we zachadnem tyźenju oficielnje zastajone, dokulaž koncern njejo we pśikazanem casu pśemógł, trjebne pódłožki prědk połožyś – stoj we powěsći regionalnego wobswětowego amta w měsće Gorzów Wielkopolski (Landsberg). Pśeśiwniki jamy wiźe we tom znamje, až jama njepśiźo.

K dopomnjeśu: Koncern PGE jo w lěśe 2016 stajił póžedanje na regionalny wobswětowy amt, aby do jamy zwólili. Amt pak jo tu wobswětowu pśespytowańsku proceduru wótstarcył, wuznajucy, až za to pśespytowanje felujo hyšći licba dokumentow a pódłožkow. Koncern jo dejał je dolibrowaś, a za to su měli tśi lěta casa. Něnto jo ten cas pśejšeł, a amt jo to pśespytowanje zastajił.