We Sakskej Šwicy, blisko městaška Bad Schandau, namakajo se na pšawem brjogu Łobja jadna něgajšna wjaska, kótarejž se groni Wendischfähre. Woglědarje njebudu to mě na toflach wuglědaś, dokulaž to jo źinsa źěł gmejny Rathmannsdorf. Wóno namakajo se jano na tofli jadneje kjarcmy, kaž teke na kórtach.

Co to ma z tym mjenim na se? We wjelich stronach pódzajtšneje Nimskeje pokazujo to słowo Wendisch na to, až te něgajšne załožarje a prědne wobydlarje jsy su byli słowjańske abo samo serbske: glěj Wendisch Evern, Wendischbaselitz, Wendischossig, Wendischluppa, Wendisch Rietz a wjele drugich. We knigłach Historisches Ortnamenbuch von Sachsen, wudanych wót derje znateju lipšćańskeju mjenjowědnikowu Ernsta Eichlera (†) a Hansa Wal­thera, jo rozkłaźone, až howko ma se ta wěc pitśku hynac.