Wótněnta maju na Górach w bórkojskem amśe wjele k cytanjeju. W młogich domach a familijach ga laže něnto na bliźe knigły, na wobalce z dłujkim titelom „Guhrow/Góry gestern und heute 1469-2019 Streiflichter aus 550 Jahren Geschichte unseres Spreewalddorfes“.

Krotko: To jo chronika teje gmejny, nic taka tłusta a wobšyrna ako na pśikład te w Barbuce, Nowej Jsy a Husu, ale weto wjelgin interesantna, pisana a raźona, a z pomocu a pilnosću młogich derje napisana a zestajana. Na wušej 80 bokach we wjelikem DIN A4 formaśe wótběžyjo we 13 kapitelach 550 lět dłujke wuwiśe na Górach a wšykno to jo wjelgin derje wupołnjone z něźi 150 za wětšy źěl historiskimi fotami a ilustracijami.