Z Baršća/Forst. Něnto jo jasne, chto buźo w lětach 2019 do 2024 cłonk w wuběrku za serbske nastupnosći (krotko: Serbski wuběrk) pśi wokrejsnem sejmje Sprjewja/Nysa. Slědny tyźeń srjodu ga su cłonki nowo wuzwólonego wokrejsnego parlamenta na swójom 2. pósejźenju we Wokrejsnem domje w Baršću wuzwólowali cłonkow wšakich wuběrkow a dalšnych wokrejsnych a regionalnych gremijow.

A tak teke cłonkow Serbskego wuběrka. Kužda tych pěś frakcijow jo we njom zastupjona. Pśedsedaŕka jo Margit Neugebauerowa (Lěwica) z Drjowka. Jej pśi boce stoje Frank Henschel (AfD) z Grodka, Fred Kaiser (CDU) z Dešna, Guido Kabisch (SPD) z Bórkow a Meike Holtsch (Freie Bürger). Kuždy cłonk ma jadnogo zastupnika. Dalej słušaju do togo Serbskego wuběrka ako wěcejwustojne (sachverständige) wobydlarje dr. Michael Hajdan z Drjowka, Astrid Šramowa z Gołbina, Yvonne Dubianojc z Prožyma, Detlef Fabian a Gerd Bzdak. Katrin Tšukowa z Dešna zastupijo ako regionalna powědaŕka Domowinsku župu we tom gremiumje.