Z Turjeja/Tauer. 18lětna Anna Kosakojc z Turjeja jo wordowała pócesćona wót chóśebuskeje rucnikaŕskeje komory ako „wucbnica (how: Lehrling) mjaseca“ – ako jadna wót 500 wucbnikow. Wóna wuknjo na kamjenaŕku (Ofensetzerin, Ofenbauerin), to groni: wóna buźo stajaś kamjeny a twariś topjenja, kótarež funkcioněruju pśez śopły luft. Serbskim luźam jo wóna znata pśez to, až jo absolwentka Dolnoserbskego gymnaziuma, angažěrujo se w Turjeju we młoźinje a pśi organizěrowanju serbskich nałogow a gótujo pla rbb serbski magacin za młoźinu Bubak.

Pśi tej góźbje jo łužyska telewizija LTV nawjerśeła filmowy portret wót njeje. We filmje wóna wulicujo, až mama a nan njejstej jej zaprědka k takemu wuwucenju raźiłej, se bójecy, až to jo typiski muskece źěło. Ale wóna jo sebje to kradu wobmysliła, derje wěźecy, co na nju caka. Pśeto jeje nan ma swóju firmu a pśedawa kaminy a dymnice.