Wuzwólowański forum w Serbskem domje z kandidatami partajow (wót lěwego boka na pšawy): Kathrin Dannenbergowa (Lěwica), dr. Martina Münchowa (SPD), Heiko Selka (BVB/Liche wuzwólowarje), Roswitha Schierowa (CDU) a Steffen Kubitzki (AfD). Pšašanja jo jim stajał pśedsedaŕ Domowiny Dawid Statnik (tśeśi wót lěwego boka). 
Z Chóśebuza/Cottbus. To lětosne wuzwólowanje do bramborskego parlamenta 1. septembra se pśibliža, a partaje běźe se wó głose wuzwólowari. Pśedsedaŕ Domowiny Dawid Statnik jo srjodu tyźeń póžył tu góźbu a pśepšosył kandidatow partajow do Serbskego domu na „wuzwólowański forum“, aby jich wupšašał, kak stoje k serbskim temam. Na forumje su se wobźělili (wót lěwego na pšawy bok):
– Kathrin Dannenbergowa (Lěwica), kandidatka we wobcerjenju 40,
– dr. Martina Münchowa (SPD), kandidatka we wobcerjenju 43,
– Heiko Selka (BVB/Liche wu-zwólowarje), kandidat we wobcerjenju 43,
– Roswitha Schierowa (CDU), kandidatka we wobcerjenju 40,
– Steffen Kubitzki (AfD), kandidat we wobcerjenju 41.
Žeden kandidat FDP njejo pśišeł, a teke žeden kandidat Zwěstka 90/Zelenych. Město togo slědnego jo pśišła Yvonne Dubianowa (cłonk wokrejsnego pśedsedaŕstwa Zelenych z Prožyma). Dla tog, až wóna njekandiděrujo, njejo se prězy sednuła.
*
