Mimo togo wuzwólowanja nowego bramborskego parlamenta, nowego krajnego sejma 1. septembra, móžomy někak w samskem casu teke hyšći wóliś 5 cłonkow noweje pśiducneje Rady za serbske nastupnosći – krotko: Serbskeje rady – za legislaturnu periodu 2019-2024. To se tak ako w juniju 2015 pśewjeźo ako wuzwólowanje z listom (Briefwahl). To groni, až musy ten abo ta, ako co se wobźěliś pśi tom, se nejpózdźej až do 21. septembra z wósebnym formularom pśipowěźeś pla wólbnego wuběrka. Ten pósćelo pón na njogo abo na nju wólbny cedlik z mjenjami wšych kandidatow. Gaž jo se wóna abo wón pón za swójich 5 kandidatow rozsuźiła abo rozsuźił, dej wólbny cedlik slědk pósłaś na wólbny wuběrk abo tam wótedaś, a to nejpózdźej až do 28. septembra. Zeger 9.00. Sobotu, 28. septembra, ga se pón głose lice, a to zjawnje, nejskerjej w Serbskem internaśe.