Depsk/Döbbrick. Pśedslědnu nje­źe­­lu jo młoźina tudy zapust swě­śi­ła. 15 pórow jo se pórało wót sportnišća z gercymi „Lutzketaler Musikanten“ na drugi kóńc jsy. „Wěcej ak 50 gólcow a źowćow pśi­słu­ša Domo­winje, ale wjele wót nas źěła. A wušej togo mamy we jsy tuchylu pšawy ‚babyboom‘ a dla tog jo jano mały źěl nas pśipódla“, jo nam groniła wjednica młoźiny Weichertojc Franciska. Wóna jo wjadła tu smugu zapustarjow gromaźe z Rań­škojc Marvinom, ak jo njasł chóžyšćo ze serbskimi bantami. Dru­ga we tom śěgu jo šła Wilhelmojc Jennifer. Jeje drastwu jo pyš­nił cesny pśepas (Schärpe). Rozmjej, to jo jeje źasety zapust. Jeje pśijaśel Christian Pšuskel z Rogozna jo njasł ten zapustojski dep­šćań­ski banaŕ. Zapustarje su wustali na wósymich dwórach – su woglědali pśed­­­sedarstwoju sportarskego towaristwa, cłonkam depšćańskeje pśi­rady, do starolutherskeje cerkwje a někotarym pśedewześarjam.