Samo ministaŕski prezident Dietmar Woidke (nalěwo: Dieter Freihoff) jo se za to zajmował na lěśojskem swěźenju SPD w Pódstupimje. Wón jo wulicował, až ma pó źělach serbske prědowniki. 
Z Lubina/Lübben. 28. septembra budu wuzwólowanja Serbskeje rady. Njejo wěcej pśewjele casa, aby wabił za toś tu wažnu wěc, měni Dieter Freihoff. Wón jo cesnoamtski zagronity za nastupnosći serbow we wokrejsu Damna-Błota. Ako južo 2015, tencas su byli slědny raz wuzwólowanja Serbskeje rady, jo wón teke tenraz wjelgin aktiwny.
Jogo Domowinska kupka Lubin jogo we tom wjelgin pódpěrujo. Zgromadnje su pśigótowali a skazali dwa roll-up ako wabjenje za te wuzwólowanja. Roll-up jo wjeliki plakat, ako dajo se stajiś a se gromadu rulowaś za transport. Z nimi zgromadnje jo źěłała zagronita za nastupnosći Serbow wokrejsa Sprjewja-Nysa Kerstin Kosakowa. Zgromadnje ze Serbskeju radu su wugótowanje plakata wuźěłali.
Z tyma „rozrulowakami“ jo Domowinska kupka Lubin cesto ducy. Na zarědowanjach kśě wabiś za Serbsku radu a wuzwólowanja k njej. Slědny raz su dojśpili we wokrejsu Damna-Błota 21 procent wuzwólowarjow za Serbsku radu dogromadu. Toś ten rezultat kśě na kuždy part zasej dojśpiś abo samo pólěpšyś.
